九龙城｜🍴☕️英伦风Chaplin的骰afternoon tea！五星级酒店前大厨主理！极高水准！☕️🍴 经过九龙城狮子石道，发现呢间叫Chaplin、门面充满英伦色彩嘅西餐厅，喺旧楼林立嘅街道，显得格外显眼！驻足门前望下餐牌，上网揿两揿，发现口碑唔错，仲系五星级酒店前大厨主理餐厅，入得！ 入到餐厅，店内装修彻头彻尾英伦风，从英伦复古风皮革梳化、英式罗马数字挂钟都可见一斑！开放式水吧、壁柜上放满空酒樽，感觉抒压轻松！加上店内播放柔和音乐，成个空间好舒服，与工作天中急促嘅生活形成好大对比！ 下午四点几嘅时间有啲尴尬，中午食完嘅lunch都未消化，但系又想同朋友坐低食少少嘢，倾吓计，于是就被呢个的的式式嘅下午茶tea set $285/2位吸引咗！ ➺烟三文鱼红菜头多士 ➺蟹肉炒蛋配烟熏希灵鱼子酱.竹炭多士 ➺迷你杂莓可丽露 ➺合桃朱古力布朗尼 ➺提子干及原味松饼 出边一般嘅afternoon tea咸甜点加埋超过10件，有啲质素嘅索价都超过$500！价钱贵之余，有时太腻，未必食得晒！ Chaplin主理人明白大众心理，呢个迷你版afternoontea set正适合食完饭之后口痕嘅时候食，唔会太多，有质素，相应价钱调低一半！ 5件点心我全部都咁钟意，外貌精致、有点缀、有detail位，一啲都唔马虎！食落更系有惊喜，食材新鲜、三文鱼好嫩滑，食物有口感、两件多士都配搭唔同质感食材、可丽露外皮烟靭、松饼热热外脆内暖，味道恰如其分、甜点都唔会太甜！真系有五星级酒店出品嘅味道！ 原本tea set包5款茶可选，但系呢度咁chill，就叫咗杯 ➺ Mojito$90 酒味不重，好清新，啱晒女仔饮！ ➺ Iced chocolate$22.5 朋友嘅iced chocolate外貌好靓，朱古力同奶渐层相隔，上面仲洒埋可可粉点缀！味道又唔太甜！赞！ 大概6点左右，店员就将餐厅嘅灯调暗，播放嘅歌曲更加有情调，好正！顺带一提，食物上枱快、会适时加水，店员多是年轻女侍应，讲嘢有礼貌，仲问你食物好唔好食添！回头率100！下次想过嚟试吓午餐或者晚餐！ ***加一服务收费