抵食午市套餐 帮朋友攞啲物资嚟大埔，其实平日真系极少会嚟呢区走动，难得出开嚟，当然要趁机四围逛下。 喺汀角路搵到间叫「牛脾气」嘅牛肉专门店，细看门外餐牌，原来餐厅主打日式料理，有刺身、烧肉、定食等供应，而且定价亦十分相宜，就一于食埋晏先回家。 点咗两个午市套餐：吉列芝士猪扒饭 ($68)、炭烧鸡扒拼明太子鸡翼饭 ($68) 同 一客日式小食：芝士薯饼 ($18)。 薯饼即点即炸，金黄色，送上来时仍热辣辣、香喷喷，卖相好吸引。挟起可以清楚见到入面嘅芝士呈流心状，薯蓉软糯绵密，同咸香嘅芝士好夹，入口外脆内软，好香好好食。 每个套餐都会附送前菜及汽水乙罐。是日前菜为火龙果沙律，沙律菜新鲜爽脆，火龙果清甜多汁，果味突出，加埋适量嘅醋汁，食落口感好Fresh。 吉列芝士猪扒饭：猪扒大大块，炸得非常香口，入面包住满满嘅流心芝士，好澎湃，食落脆卜卜，肉质松化又有肉汁，配埋面头咸鲜嘅明太子沙律酱一齐食，饱肚得嚟又唔会过腻。 旁边嘅鸡蛋味道亦唔错，蛋香浓郁滑嫩，用嚟拌饭吃，令人食欲大增。 至于另一客炭烧鸡扒拼明太子鸡翼饭，亦做得相当出色。鸡扒都几大块，厚身得嚟又有肉香，而且最正就系腌得好入味，肉质嫩滑不嚡，入口带阵阵炭烧香。 鸡翼鼓鼓的，外皮金黄焦香，入面酿满了明太子，入口啖啖肉，咸香得嚟又带点微辣，好惹味，鸡肉嫩滑可口，用嚟佐饭真系一流！