Owens(太子) 地址: 太子砵蘭街412號地舖 今日中午喺太子見到呢間光猛舒服嘅西餐廳，價錢抵食，坐滿晒客人，真係好受歡迎！ · 脆炸魷魚鬚：魷魚鬚外層粉漿薄脆，炸到金黃香口，裡面嫩滑彈牙，點埋他他醬，更加鮮味！ ·蜜糖柚子雞翼：充滿蜜糖嘅甜香同柚子嘅清新，開胃又惹味，食到啜手指！ ·牛油炒野菌：野菌吸晒牛油嘅香氣，菌香同牛油奶香濃郁，口感多汁軟滑！ · 紅酒汁燴牛胸腹肉意粉：有好多大塊嘅牛胸腹肉，經慢煮後肉質軟淋近乎融化，纖維吸透濃郁紅酒汁，香味深邃，層次豐富！ ·法式香草燒羊架飯：羊架烤到微脆，裡面係誘人嘅粉紅色，肉質超嫩又多汁，羊羶味處理得啱啱好，只剩低迷人肉香！Lunch Set 仲送濃郁餐湯同暖胃清新嘅熱香茅生薑蜜同蘋果汁！ ·牛角窩夫配雙色雪糕：窩夫外脆內軟，牛油香濃烈。配埋雲呢拿同朱古力雙色雪糕，兩種口味都正！ · 法式焦糖燉蛋：面頭層薄脆焦糖，下面係冰涼滑溜、蛋香濃郁嘅燉蛋，濃厚奶香喺口裡面化開！ ·藍莓芝士蛋糕：面頭淋滿酸甜嘅藍莓果醬，多到瀉出嚟，同濃厚芝士簡直係絕配！ ·朱古力心太軟伴雪糕：邪惡又無法抗拒！用匙羹輕輕一篤，濃稠熱辣嘅朱古力熔岩即刻湧出！濃郁朱古力味加上冰凍雲呢拿雪糕，口感豐富到令人尖叫！ · 芝士蛋糕：芝士蛋糕質地綿密細緻，芝士味濃郁香醇，口感順滑，原味更能食到純粹嘅芝士乳香！ 芝麻提拉米蘇 面頭灑滿炒香嘅芝麻粉，一勺挖落去——中間竟然藏住軟糯煙韌嘅糯米糍！芝麻濃香同咖啡酒香交融，凍食口感似雪糕又似慕絲，糯米糍QQ哋嘅咬勁令人驚喜！