雞煲+火鍋放題 100多元 很化算～

星期一，唔想返工，唔想煮飯！！所以同老公出去食完野先返屋企。諗住隨便鋸扒就算，點知老公問我知唔知傷心酸辣粉喺邊，我第一個反應係：佢有雞煲放題，我想試好耐喇🤤 $108任飲任食，仲可以添雞，老公仲話有海蜇食，正呀 店內幾乾淨企理，冇乜油煙，冷氣夠。我地撚揀左張方枱坐，搵下個餐牌，點解冇我諗嘅落單紙嘅？ 我的心中小劇場： 1.揀煲，有麻辣雞煲，有烤魚 2.有張落單紙，剔低想要嘅野 3.我要剔肥牛啦，滑牛啦，豬肉啦，炸魚皮啦，新鮮蔬菜啦，小食涼拌菜啦.... 4.然後拎野飲 5.開動，食完舉手再添雞 真實情況： 1.叫左個bb辣嘅麻辣雞煲 2.店員遮遮話：自助出去拎野食 下，邊到拎，o....眼前係一個4層雪櫃 裏面有不同丸物，不同蔬菜（係新鮮嘅），牛，雞，豬，添嘅雞就係喺雪櫃拎。而另一邊係涼拌菜，有雞翼尖同青瓜皮蛋，但冇海蜇，可能我遇唔到 我夾左肉肉同菜，仲有d涼拌小食，跟住返去同老公講，好似有d伏 老公：唔會嘅 咁我地一邊食下青瓜皮蛋同雞翼尖，一邊等雞煲滾下滾下 果然老公冇錯，冇伏，仲好好食，只不過係我太習慣食雞煲有order紙呢樣野姐，同埋呢度選擇唔算好多，不過都係嗰d野食啦，呢個價錢又真係差不多 青瓜皮蛋：手拍青瓜配皮蛋，同時享受軟滑和清爽口感，味道唔錯，只係皮蛋唔夠軟心 麻辣雞煲麻味香濃，打開鍋蓋就一陣麻辣香氣撲面而黎，配料多，芫荽洋蔥香芹絕不吝嗇，麻辣味道分配得宜，喜歡帶有少少甜味。醬汁屬於偏濃嗰種，但絕對足夠加雞再炒，我地加左2轉雞，再加肥牛炒，冇加湯亦冇燶底，味道keep到。反而最後加湯烚菜，就覺得只有辣油味。雞夠嫰滑，一個雞煲得半隻雞，如果添雞要自助拎。小貼士：大膽地同遮遮講要refill,如果唔係遮遮真係唔會定時定候補貨架。 埋單$216冇加一，食得飽同好食，都覺得抵架，任飲選擇多嘅，係冇無糖茶，好彩有zero，仲有啤酒，熱辣辣天氣，幾個frd聚埋食雞煲飲啤酒吹水真係幾chill嘅。總結：可以再黎[愉快]

上次經過見到傷心酸辣粉，竟然有雞煲和烤魚放題，見價錢又抵食，今日即刻同屋企人去食。 烤魚雞煲放題，$88/位（90分鐘），2位可以任選一款烤魚或雞煲，4位可以選兩款，火鍋配料、熟食、汽水、啤酒無限添加，好抵食 烤魚有6款味道選擇，有辣有唔辣，我地唔太食得辣，所以簡左金牌蒜香味烤魚。 一上枱，勁重蒜香味，烤魚用上巴沙魚，好大條，上面鋪滿了蒜頭、炸蒜，未食已經香氣撲鼻，巴沙魚肉經過調味，夠入味，魚肉最緊要冇咩骨，得一條大骨，夠厚身，啖啖肉，而且沒有腥味和泥味。 食完烤魚就可以開始打邊爐啦， 火鍋配料都有好多選擇，有丸類、娃娃菜、蘿蔔片、芝士膠、蓮藕片、豬紅、生菜、燒賣等等 熟食有兩款選擇 飲品：有汽水、啤酒、紙包飲品、罐裝飲嘢 最後食埋個椰汁糕、大菜糕就飽晒啦