做「搬運工」中場休息嚟呢度搵食醫肚，但奈何工廠區有得揀嘅嘢選擇太少。即使有都係辣嘢。本身都唔嗜辣，加上老鏈咁大個太陽仲食辣就更加火上加火，林下都係咪制。 呢間「阿玲士多」居然係有盒仔飯食，而且仲係即炒果種條，見冇得揀就祗能食佢。 祗見呢度環境比較惡劣，表面睇係一間城中村士多，門口2大張膠檯，幾個外地務工者棟起隻腳係度食緊飯。咁嘅環境真係好食？但冇得揀啊！！！ 擺放嘅餸菜除咗蔬菜係生之外，其他熟食祗係隨便擺放，而且冇遮冇掩。衛生環境甚憂囉。 此情此景祗能同個同事一人一份，佢要咗份冬菇炒肉絲，我就要咗份龍牙豆炒白切雞。對！！！大家冇睇錯，的而且確係「龍牙豆炒白切雞」 冬菇炒肉絲：呢個餸反而冇咩問題，而且炒得幾好食，仲好大碟。冬菇都幾滑。 龍牙豆炒白切雞：一上菜，我以為係辣椒炒雞，我問我同事，“嘩！使唔使咁多辣椒炒啊！太重口味啦吧？”但一問先知原來係「龍牙豆炒白切雞」。問題嚟啦，乜「龍牙豆」可以要嚟炒「白切雞」咩？而且d白切雞本身係有辣椒。我食咗幾十年粵菜都未食過有咁嘅配搭，到底係我孤陋寡聞？定係新創意？我哋嘅「粵菜」居然俾d「煲冬瓜人」升華到咁嘅地步，到底係開心？定係悲哀呢？都係果句「冇得揀」！但食落又唔係難食嘅，不過配搭比較奇葩囉！ 埋單2個飯+水30大洋。唔貴，但下次再嚟我一定唔會再食。因為我唔想再食d不倫不類嘅粵菜囉。